Beang:Jhyuk

Tyiet tazwa jhyuk mi̱ Wukipedia

Wukipedia yet wuki hwa, si̱ huni si̱ fa nyia̱ konyan wa maai a̱ jhyuk kpa̱mkpaan ma̱ng kuzang wat a̱wot a̱ mbeang ja̱u a̱yaati̱kut kiki. Mi̱ ta hwa a tsa nyia̱ ri̱jisi̱ta a sii du byia̱ a̱wat nyia̱ a̱nia ka bah, a̱wot á̱ ngyei konyan a̱ ku mak jhyuk A̱tyuwukipedia ku a̱tyujhyuk. A̱cyuang njhyuk ni̱ tung, a̱wot kuzang a̱tyujhyuk maai a̱ tsot fi̱ri̱ng nyia̱ a̱ ku shyia̱ mami á̱niet ba ba̱ ku mbeang jhyi Wukipedia mat konyan a̱ni. Á̱ mbyia̱ tityannwuan jhyuk sweang ja: VisualEditor (VE) ku yet fai hu ma̱ng jhyuk wikitext (markup wuki) ku yet a̱khwukhwop wu, a̱ nyian ta̱m ma̱ng Kyangjhyuk A̱tyin hu.

Jhyuk a̱yaati̱kut

Bu nwuan: Wukipedia:Lyi̱ri̱m A̱nci̱ri̱ng/Jhyuk, Beang:A̱son tyai jhyuk ma̱ng VisualEditor, and Beang:A̱son tyai jhyuk ma̱ng Markup Wuki

Sa̱mai kyangmami ma̱ng cám

Bu nwuan: Wukipedia:Cám nkyangmami a̱cyian

Wukipedia yet a̱lahyia̱ á̱nietbishyi kya, nang á̱ khwuk, á̱ jhyuk, a̱wot á̱ kwak a̱son ma̱ng a̱babyet kya neet mbwak Lyen ku nwai yet A̱za̱za̱rak a̱ni nang á̱ ngyei AI a̱ni. Jat ati̱kut Wukipedia ji na yet á̱ lyuut a̱kyokyuat nkhang ma̱ng nkhang na na̱ yong tsi̱tsak-tsi̱tsak a̱ni nang á̱ mi̱ ta̱kpang wa neet mi̱ nkhang jhyang na̱ wa ka̱n shyia̱ a̱zalang a̱ni tazwa a̱pyia̱-a̱lyiat a̱ghyang. Wukipedia nwai shei a̱tsak ta̱m zop a̱yin bah. A̱gban lyen yet, mi̱ za̱kwa, a̱vwuoneet nkhang a̱nu a̱tyotat kya ka̱ nwuat sovee nkhang nang á̱ wa ka̱n shei a̱yin-a̱vwuo a̱ni mi̱ swanta hu. Ka̱ cat hwa yet shyia̱, ku myim á̱ ta̱fang a̱vwuoneet kuzang nkhang a̱wot ka̱ yet a̱si̱ nang a̱yin na maai a̱ cat a̱cucuk nkhang nna a̱ shyia̱ da̱ a̱ka̱vwuoneet á̱ maai ta̱yuk da̱ nkhang nna na a̱ni. Yet ta ya̱fang a̱ka̱vwuoneet hu ni̱ byia̱ cet a̱ swak ka̱nang a lyuut ati̱kut wu tazwa a̱tyu a̱ ni̱ shyia̱ ma̱ a̱cet kya a̱ni. Sa̱mai a̱gban lyen ma̱ng a̱nwuat nwuat á̱ghyang shi wa yet a̱tsatsak wu: nat ca̱caat, yong bwan a̱ji bwan a̱ja̱u bah; si̱ a̱hwa lan lyuut a̱junjung nkhang, lyuut ma̱ng a̱nwuat fwuon zook, ma̱ng lyuut mat a tak ma̱ng á̱niet kyang hu a dam a̱ni.